Gipahayag sa Bureau of Immigration (BI) nga wala pa sila’y natala nga bag-ong rekord nga nag-ingon nga nakagawas na sa nasod si Senador Ronald “Bato” Dela Rosa.
Sa gihimo nga pagpangutana sa Bombo Radyo, gipaambit ni Immigration Spokesperson Dana Sandoval nga sa pagkakaron, walay bag-ong travel records nga na-monitor ang ilang buhatan. Ang maong pamahayag migawas human mapabalita nga nakabiya na sa Senado ang senador kaganihang pasado alas-dos sa kadlawon.
Giklaro usab sa tigpamaba nga dili sakop sa ilang buhatan ang mga domestic flights, ilabi na kon ang mambabatas nilupad paingon sa ubang dapit o probinsya sulod lang sa Pilipinas.
Si Senador Dela Rosa kasamtangang nag-atubang og kasong ‘Crimes Against Humanity’ sa International Criminal Court (ICC) tungod sa ‘war on drugs’ sa miaging administrasyon. Aduna na’y giluwatan nga arrest warrant ang maong tribunal batok kaniya, apan sa pagkakaron, wala pa kini malampusong naserbi tungod sa nagpadayon nga petisyon sa Korte Suprema.