Nanawagan si ACT Teachers Partylist Rep. Antonio Tinio sa mga senador nga magsilbing impeachment judges nga paboran ang kamatuoran ug ebidensya imbes nga politika sa higayon nga magsugod na ang paglilitis batok kang Bise Presidente Sara Duterte.
Sa pakighinabi sa Bombo Radyo, gipasiugda ni Tinio nga ubos sa Konstitusyon, ang Senado molihok isip usa ka hukmanan. Gipahinumdoman niya ang mga mambabatas nga dili sila maglihok isip ordinaryong politiko kondili isip mga huwes nga kinahanglang mahimong patas ug mabinantayon sa ilang hukom. Matod niya, dili angayng mahimong babag ang bisan unsang kausaban sa liderato sa Senado o ang pagka-kaalyado sa pipila ka senador ngadto sa pamilyang Duterte.
Dugang pa, giingon ni Tinio nga importante ang partisipasyon sa Bise Presidente sa maong proseso aron mahatagan siya og higayon nga matubag ang mga alegasyon ug aron mahibalo ang publiko sa kamatuoran.
Sa pagkakaron, pormal na nga nadawat sa Senado ang Articles of Impeachment gikan sa Kamara. Gibutyag ni Senate President Alan Peter Cayetano nga plano nila nga pormal nga magtigom isip Impeachment Court karong Lunes, Mayo 18, o sa labing daling panahon. Gipaabot nga ang tibuok nasod motutok niining makasaysayanong lakang sa gobyerno.