Gisusi na karon sa National Bureau of Investigation (NBI) ug Philippine National Police (PNP) ang posibilidad nga duna’y nahitabong sabotsabot o “staged encounter” sa nahitabong pagpamusil sulod sa Senado. Bisan pa man og nagdumili pa sa pagkumpirma si NBI Director Melvin Matibag, giangkon niini nga kabahin ang maong anggulo sa ilang gihimong lawom nga imbestigasyon base sa mga factual evidence, CCTV footage, ug mga basiyo sa bala nga narekober sa dapit.
Sumala ni PNP Chief Lt. Gen. Jose Melencio Nartatez Jr., gi-ihap na karon ang tanang security forces nga anaa sa sulod sa Senado atol sa insidente, lakip na ang mga sakop sa OSAA, PSPG, ug Philippine Marines. Moabot na sa 20 ka indibidwal ang nailhan ug gipaubos sa kumpirmasyon sa mga otoridad aron itandi ang ilang mga pamahayag ngadto sa mga pisikal nga ebidensya. Pasalig ni Matibag nga isapubliko nila ang resulta sa higayon nga mahuman na ang ilang pagsisiyasat aron matapos na ang mga espekulasyon.Ang maong pagduda sa “staged” shootout maoy dakong hinungdan sa nagpadayong kaguliyang sa impormasyon, samtang nag-ung-ong pa ang pinal nga resulta sa ballistics test. Sa pagkakaron, natanggong pa ang katin-awan kon tinuod ba nga duna’y plano luyo sa maong kagubot aron paboran ang pipila ka personalidad.