Gikumpirma ni Senate President Alan Peter Cayetano nga wala na sa sulod sa gambalay sa Senado si Senador Ronald “Bato” Dela Rosa human sa nahitabong maduguong kagubot kagabii. Base sa text message sa asawa sa senador, gigamit ni Dela Rosa ang higayon sa dihang mibuto ang kagubot aron makalingkawas gikan sa building tungod kay dili na niya gusto nga madamay pa ang iyang mga kauban sa pagsulay sa International Criminal Court (ICC) nga arestuhon siya.
Gipadayag pa ni Cayetano nga walay sayop sa pagbiya ni Dela Rosa sa Senado tungod kay wala may mapakita nga arrest warrant ang National Bureau of Investigation (NBI) aron mamatud-an nga adunay kasalanan ang senador, ug gipahimug-atan niya nga ang warrant lamang gikan sa mga korte sa Pilipinas ang ilang ilhon. Nahimong emosyonal ang Senate President sa dihang gipangutana kon tinood ba nga gironda ang Senado, diin iyang gipasiatab nga wala nay angay duhaduhaan nga giatake ang institusyon sa maong insidente.
Sumala sa incident report gikan sa OSAA, nagsugod ang binayloay sa bala human duna’y nakit-an nga duha ka lalaki nga naka-bulletproof vest nga dunay marka nga NBI. Sa dihang gisulayan og susi sa Senate Security, nibunot og armas ang maong mga lalaki hinungdan nga nagpaputok og warning shots ang seguridad sa Senado. Miabot sa 32 ka mga basiyo sa bala ang narekober sa dapit diin 27 niini naggikan sa Senate Security samtang lima gikan sa kampo sa NBI.