Nagkagubot sa Ayala Bridge, Manila diin mikabat na sa kapin 30 ka tawo ang nasamdan human nag-atbang ang mga raliyista ug kapulisan atol sa usa ka protesta kontra-korapsyon ning adlawng Domingo sa hapon.
Base sa mga taho, misaka ang tensiyon sa dihang misulay og sulod ang mga demonstrador sa baryer nga gibutang sa kapulisan aron makapadayon sa ilang martsa paingon sa Liwasang Bonifacio ug Mendiola, nga duol sa Malacañang.
Nagsugod ang kagubot sa dihang gisindihan sa pipila ka batan-ong lalaki ang mga ligid sa atubangan sa usa ka shipping container nga nagsilbing harang sa mga pulis.
Nanglabay usab kini og mga botelya, bato, ug pintal, hinungdan nga napugos ang kapulisan sa paggamit og riot shield.
Takna alas-4 sa hapon, nabungkag ang harang ug nakalusot ang mga raliyista padulong sa Legarda Street paingon sa Mendiola Bridge.
Nadaot ang samin sa usa ka payloader duol sa usa ka unibersidad, ug gisunog ang usa ka motorsiklo sa lugar.
Gidugang pa nga adunay natalang kusog nga pagbuto nga hangtod karon wala pa matino ang gigikanan.
Pipila usab ka mga pulis ang nasabyagan sa usa ka baho kaayong kemikal nga wala pa masayri ang komposisyon.
Sa tunga sa tensiyon, nagpabilin nga alerto ang mga otoridad ug misangkap og dugang contingent aron masiguro ang kahapsay ug mapugngan ang dugang kagubot.
Sa pikas bahin, nanawagan ang mga organizers sa kalinaw ug disiplina sa mga mitambong.
Base sa pinakaulahi nga impormasyon gikan sa Manila Disaster Risk Reduction and Management Office (DRRMO), kapin sa 49,000 ka indibidwal ang nakighiusa sa protesta sa Luneta, ug nagpadayon pa ang pagdagsa sa mga tawo.
Ang kalihokan gisalmotan sa mga estudyante, aktibista, ug lain-laing grupo nga nagtinguha sa transparency ug accountability sa gobyerno, ug pagpahimangno batok sa posible’ng pagbalik sa mga pag-abuso sa panahon sa martial law.
Lakip sa mga mitambong ang mga estudyante gikan sa Ateneo de Manila University nga migula sa ilang mga tulunghaan aron makighiusa sa aktibong rally batok sa korapsyon.
Padayon ang pagbantay sa kapulisan ug seguridad aron masiguro ang kalinaw ug kahapsay sa tibuok kalihokan.