Mikunhod og 6.3 porsyento ang produksyon sa lokal nga humay sa Pilipinas gikan Enero hangtod Marso 2026, sumala sa Philippine Statistics Authority, tungod sa epekto sa mga bagyong miigo sa nasod niadtong miaging tuig ug kadaot sa mga irrigation system.
Miabot lamang sa 4.4 milyones ka metric tons ang produksyon, nga mao na ang pinakaubos nga first-quarter output sukad 2020.
Matud ni Agriculture Secretary Francisco Tiu Laurel Jr., nakaapekto usab sa pagtanom sa mga mag-uuma ang ubos nga farm-gate prices sa humay sa wala pa ipatuman sa gobyerno ang temporaryong limitasyon sa rice importation niadtong 2025.
Tungod sa pagkunhod sa lokal nga produksyon, misaka usab ang rice importation sa nasod ngadto sa 1.68 milyones ka metric tons gikan Enero hangtod Abril 2026, diin Vietnam nagpabiling pinakadakong supplier sa imported rice sa Pilipinas.
Samtang, giingon sa Department of Agriculture nga gikonsidera nila ang paglimite sa monthly rice imports sugod Hunyo hangtod Agosto aron mapadayon ang stable nga suplay sa bugas ug matabangan usab ang lokal nga mga mag-uuma.