Gipasidan-an sa usa ka batid sa ekonomiya ang posibleng paghinay sa Gross Domestic Product (GDP) sa nasod kon dili mohunong ang mga opisyal sa gobyerno sa sobrang pagtutok sa mga isyu sa politika ug impeachment. Sa pakighinabi sa Bombo Radyo, gibutyag ni Ray Talimio Jr., kanhing miyembro sa Economic Development Committee sa RDC-X, nga nabalewala na ang pag-atubang sa mga economic issues sama sa inflation tungod sa nagpadayong kagubot sa kaulohan.
Sumala sa datus, mibagsak sa 2.8 porsyento ang GDP growth sa unang quarter sa 2026 gikan sa 4.4 porsyento sa miaging quarter—usa ka senyales sa nagkaduol nga recession kon magpadayon ang pagkunhod sa produksyon. Samtang misaka usab ang inflation ngadto sa 7.2 porsyento, nanawagan si Talimio nga kinahanglan nang molihok ang economic managers sa administrasyong Marcos aron makahatag og konkretong solusyon alang sa sektor sa transportasyon, mangingisda, ug mga mag-uuma nga maoy grabeng naigo sa oil crisis.