Nadiskubrehan sa usa ka 56-anyos nga tag-iya ang makalilisang nga sinuwayan sa mga kawatan human iyang nakit-an ang usa sa iyang mga baka nga patay na, gilapa, ug gipanitan kagahapon sa buntag, Mayo 14, sa Sitio Karang-karang, Barangay Kalasungay, Malaybalay City. Base sa report sa Malaybalay City PNP, pasado alas 8:00 na sa buntag sa dihang nakit-an ang maong hayop sa ilawom sa usa ka banana plantation, human kini gitigway sa tag-iya mga tulo ka kilometro gikan sa iyang pinuy-anan.
Sumala sa imbestigasyon, nakadawat og impormasyon ang kapulisan gikan sa security guard sa sagingan human nakit-an sa ilang trabahante ang maong baka nga nakuhaan na og unod ug panit. Hinuon, swerte nga nakit-an pa nga buhi ang ikaduhang baka sa gilay-on nga 500 metros gikan sa dapit diin gilapa ang unang hayop, diin gituohan nga duna pa’y plano ang mga suspek nga balikan kini aron kabaon usab.
Ang maong insidente sa paglapa sa hayop sa hilit nga dapit maoy dakong hinungdan sa kabalaka karon sa mga nanag-iya og hayopan sa maong barangay. Samtang padayon pa ang dugang imbestigasyon sa kapulisan, natanggong pa ang pag-ila sa mga responsable niining linuog nga pagpangawat aron mapasakaan sa saktong kaso.