Gipadayag sa usa ka vendor ning dakbayan sa Malaybalay ang iyang grabeng pagkadismaya batok sa administrasyong Marcos human sa pagkabungkag sa alyansang UniTeam ug ang nagpadayong isyu sa impeachment batok ni Bise Presidente Sara Duterte. Sa pakighinabi sa Bombo Radyo, miangkon si Rose Villarta nga mibati siya og “pagkabudol” tungod kay gibotar lamang niya si Presidente Ferdinand Marcos Jr. sa miaging eleksyon gumikan sa tandem niini sa mga Duterte, apan karon nakita niya ang giingong personal ug politikal nga interes sa pipila ka mambabalaod.
Dugang pa ni Villarta, dili siya uyon sa impeachment complaint batok sa Bise Presidente tungod kay wala siya’y nakitang bug-at nga rason o dakong sayop nga nahimo niini aron tangtangon sa pwesto. Nanindigan ang maong negosyante nga padayon niyang suportahan si Duterte hangtod sa eleksyon sa 2028 tungod sa pagtuo nga duna kini tinuod nga kasingkasing alang sa mga kabus, samtang gisaway usab niini ang nagpadayong kagubot sa politika taliwala sa pagsaka sa presyo sa mga palitunon.