Nakatingkagol na karon sa selda ang lima ka mga lalaki human malampusong nadakpan sa mga operatiba atol sa gihisgotang drug buy-bust operation kagahapon sa hapon, Mayo 14, sa Purok 4B, Barangay Aglayan, Malaybalay City. Giila ang mga suspek sa mga alyas nga “Ramon,” 47-anyos; “Toto,” 43-anyos; “Jun,” 20-anyos; “Mark,” 32-anyos, kinsa pulos mga residente sa Aglayan; ug si “Allan,” 44-anyos, nga lumulupyo sa Barangay Casisang.
Sumala sa report sa kapulisan, nakuha gikan sa mga suspek ang gibana-banang lima ka gramo sa gituohang shabu nga nagkantidad og 34 mil pesos, kauban ang nagkalain-laing drug paraphernalia ug buy-bust money. Gawas sa gidili nga druga, narekober usab gikan sa posisyon ni alyas “Allan” ang usa ka .38 caliber nga armas nga duna’y tulo ka mga bala.Ang maong malampusong operasyon maoy dakong hinungdan sa padayong pagkunhod sa suplay sa druga sa maong dapit. Samtang nag-ung-ong na ang pagpasaka og kasong paglapas sa Comprehensive Dangerous Drugs Act of 2002 ug illegal possession of firearms, natanggong na sa karsel ang mga suspisiyado samtang nagpaabot sa saktong disposisyon sa korte.