Gihangyo ni Vice President Sara Duterte sa Senate Impeachment Court nga ibasura ang Articles of Impeachment batok kaniya, ug gipunting niini nga adunay “fatal constitutional, procedural, and substantive defects.”
Sa usa ka taas nga tubag nga gisumite sa iyang mga abogado sa Senado niadtong Lunes, Hunyo 1, sumala sa kampo ni Duterte nga ang reklamo wala matud pa nakasunod sa mga sumbanan sa Konstitusyon ug kinahanglan kini nga i-dismiss.
Usa sa mga giingong dakong argumento sa kampo sa Bise Presidente mao ang alegasyon nga milapas sa awtoridad ang House Committee on Justice human kini nagpadayon og giingong “mini-trial” sa ilang mga pagdungog.
Dugang pa usab nga ang Kamara lamang ang adunay gahum sa pagsugod sa impeachment proceedings, samtang ang Senado ang mo-litis ug mohimog desisyon sa kaso.
Sigon pa sa depensa nga naapektuhan ang fairness sa proseso tungod sa mga pamahayag sa pipila ka mga mambabalaud nga adunay igo nang boto para sa impeachment ug lig-on na ang ebidensya batok kaniya bisan wala pa matapos ang imbestigasyon.
Matud sa ilang gisumite nga tubag, nalapas usab ang due process rights sa Bise Presidente gumikan adunay mga bag-ong ebidensya nga gipresentar sa pagdungog nga wala matud pay apil sa orihinal nga reklamo.
Hingpit usab nga gipanghimakak sa kampo ni Duterte ang mga akusasyon bahin sa giingong misuse sa confidential funds, unexplained wealth, ug mga paglapas sa SALN.
Dugang pa sa depensa nga wala pay pinal nga desisyon gikan sa bisan unsang korte nga nagpakita sa graft, corruption, plunder, o iregularidad sa paggamit sa pondo.
Giingon pa nga ang mga alegasyon “nakabase lamang sa assumptions, conjectures, and speculative inferences.”
Samtang, napakyas usab ang Articles of Impeachment sa pagpakita og lig-on nga basehan aron mapamatud-an ang bisan unsang constitutional grounds sama sa culpable violation of the Constitution, bribery, graft and corruption, high crimes, o betrayal of public trust batok kaniya.