Nasikop ang upat ka lalaki sa hiniusang drug buy-bust operation sa kapulisan ug Philippine Drug Enforcement Agency o PDEA sa Purok 5A, Barangay 9, Malaybalay City, Bukidnon, pasado alas tres sa hapon niadtong Oktubre 16, 2026.
Sumala sa report sa Bukidnon Police Provincial Office, ang mga dinakpan nag-edad og 19, 33, 33 ug 42 anyos, nga giila sa kapulisan nga mga street-level drug personalities.
Narekober sa operasyon ang pito ka sachet sa gidudahang shabu nga adunay kinatibuk-ang gibug-aton nga 3.074 gramos ug gibanabanang kantidad nga ₱20,903, lakip ang ₱500 nga buy-bust money.
Gipahigayon ang operasyon sa Malaybalay City Police Station Drug Enforcement Unit, uban sa Provincial Intelligence Unit, 1st Provincial Mobile Force Company ug PDEA.
Samtang, giandam na ang kasong paglapas sa Sections 5, 11 ug 26 sa Republic Act 9165 o Comprehensive Dangerous Drugs Act of 2002 batok sa mga suspek.
Sa laing bahin, gidala na sa Regional Forensic Unit 10 sa Cagayan de Oro City ang mga nakumpiskang gidudahang ilegal nga droga alang sa eksaminasyon, samtang nagpabilin sa kustodiya sa Malaybalay City Police Station ang upat ka dinakpan.