Gipangandaman na sa lokal nga panggamhanan sa Valencia City, Bukidnon, ang posibleng grabeng epekto sa Super El Niño pinaagi sa pag-andam og ₱40 milyon nga Quick Reaction Fund ug pagpalig-on sa suplay sa tubig, pagkaon, kuryente ug serbisyong panglawas.
Sa pakighinabi sa Bombo Radyo Malaybalay, gibutyag ni City Administrator Atty. Heinz G. Villanueva nga nagmugna og El Niño Task Force ang administrasyon ni Mayor Amee Galario aron manguna sa mga lakang batok sa posibleng hulaw.
Gipahibalo niini nga adunay dugang ₱100 milyon nga pondo alang sa emerhensiya, samtang ₱1 milyon ang gigahin para sa mga water pump nga makatabang sa mga mag-uuma.
Gipangandam usab ang mga water tank, hose ug jetmatic pump, lakip ang posibleng water rationing sa mga barangay nga makasinati og kakulang sa tubig.
Matod ni Villanueva, wala pay natala nga barangay nga grabeng naapektuhan sa hulaw, apan padayon ang matag semana nga monitoring sa task force.
Sa laing bahin, giawhag sa lokal nga panggamhanan ang mga residente nga magdaginot sa tubig ug maglikay sa sobrang pagkaladlad sa kainit aron malikayan ang heat stroke.