Giklaro sa Malakanyang nga ang pakig-alayon sa nasud ngadto sa Iran dili makaapekto sa relasyon sa Pilipinas ug Estados Unidos.
Kini human pormal nga mihangyo ang kagamhanan nga tugotan ang mga barko sa Pilipinas nga luwas nga makaagi sa Strait of Hormuz.
Sumala ni Presidential Communications Office Undersecretary Claire Castro, ang maong lakang gihimo aron masiguro ang kaluwasan sa marinong Pinoy ug ang padayon nga suplay sa lana sa nasud
Gipasabot sa opisyal nga ang Strait of Hormuz usa ka kritikal nga agianan sa mga tanker sa lana, busa importante ang koordinasyon sa Iran nga maoy nagdumala sa maong dapit.
Gipaniguro sa Malakanyang nga ang maong “Hormuz Deal” alang sa ekonomiya ug seguridad, ug wala kini kalabutan sa bisan unsang politikanhong isyu tali sa Amerika ug Iran.
Gani, nagpabiling lig-on ang diplomasiya sa Pilipinas sa duha ka nasud samtang giuna ang interes sa katawhan.
Sa pagkakaron, gipaabot nga pormal nga aprubahan sa Iran ang maong hangyo aron malikayan ang bisan unsang tensyon sa kadagatan nga mahimong moresulta sa pagsaka sa presyo sa lana sa merkado