Naghatag og reaksyon ang National Food Authority (NFA) kalabot sa forecast sa Department of Agriculture nga posibleng mosaka ang presyo sa bugas ngadto sa ₱60–₱62 kada kilo sa bulan sa Septyembre.
Sumala ni Informaton Officer Glenn A. De Otoy sa National Food Authority, Bukidnon, wala pa silay nakitang klarong indikasyon nga mo-spike ang presyo sa merkado, ug gipasiugda nila nga wala na sila’y marketing function nga direktang nagkontrol sa presyo sa bugas.
Gipatin-aw usab sa ahensya nga ang ilang papel karon mao ang pagseguro sa igo nga buffer stock aron masiguro ang food security sa nasod.
Nagpabilin ang koordinasyon nila sa Department of Agriculture aron mapadayon ang stable nga suplay ug malikayan ang kalit nga pagsaka sa presyo.
Sa kasamtangan, ang buffer stock sa NFA anaa pa sa 21 ka adlaw nga konsumo, nga katumbas sa mga 200,000 ka sako sa bugas.
Kini igo ra aron makatubag sa panginahanglan sa panahon sa kalamidad o emerhensiya.
Padayon usab ang procurement sa palay aron mapun-an ang stock sa mga bodega ug masiguro nga adunay igong suplay sa umaabot nga mga bulan.