Upat ka indibidwal ang nadakpan sa managlahing operasyon sa kapulisan sa Bukidnon niadtong milabay’ng, lakip ang usa ka suspetsado sa ilegal nga droga ug tulo ka wanted sa lain-laing kaso.
Nasikop sa buy-bust operation sa Pangantucan niadtong Oktubre 12, gabii, ang 33-anyos nga si alyas Ton-Ton. Nasakmit gikan sa posisyon niini ang upat ka pakete sa gituohang shabu nga motimbang og 5.04 gramos ug nagkantidad og ₱34,272, lakip ang cellphone, motorsiklo, kaha sa sigarilyo ug ₱500.
Nadakpan usab si Salvador Sabanal Ator, 38 anyos, sa Lantapan tungod sa kaso nga malicious mischief, ug si Pablito Algabre Nuevo, 64 anyos, sa Don Carlos tungod sa kasong murder. Si Ator adunay girekomendang piyansa nga nagkantidad og ₱2,000 samtang walay piyansa nga gipahamtang batok sa kaso ni Nuevo.
Nadakpan usab sa Malaybalay si Rex Cambal Aplaon, 54 anyos, nga giila nga numero uno sa most wanted list sa probinsya ug siyudad. Nag-atubang kini og 3 counts sa sexual assault ug5 counts sa statutory rape.
Ang tanang nadakpan anaa na sa kustodiya sa kapulisan alang sa hustong pagproseso sa ilang mga kaso.