Gihagit sa presidente sa Liga ng mga barangay nga si Julius Manghano si Konsehal Jason Chad Ayala nga panganlan ang mga kapitan sa siyudad sa Malaybalay nga gikaiingong nangayo og kickback sa mga kontraktor.
Matud sa opisyal, nakurat kini sa post nga gipagawas sa konsehal ngadto sa social media ug gani naghatag pa kini og komento nga pangalan ang mga kapitan nga nalambigit sa isyu isip hagit sa kagamhanan aron mahatagan og igong aksiyon sanglit mapamatud-an ang alegasyon batok kanila.
Gidugang pa niini, gilauman nga madawat karong adlawa ang listahan sa mga nalambigit sa gikaiingong alegasyon gikan mismo sa konsehal ug gihulat na lamang ang tawag o impormasyon gikan niini.
Kahinumduman nga gibulgar ni Konsehal ang maong rebelasyon atol sa sesyon sa Sangguniang Panglungsod human sa iyang facebook post.
Gibutyag ni Malaybalay City Councilor Jason Chad Ayala nga adunay unom hangtod walo ka barangay kapitan nga nalakip sa listahan nga iyang nadawat nga may kalabotan sa alegasyon sa pagpangayo og 10 porsyento gikan sa mga kontraktor sa dakbayan.
Giklaro niini nga adunay kontraktor nga miduol sa iyang buhatan aron ireklamo ang maong alegasyon, apan naghulat pa siya sa mga ebidensiya sa dili pa kini ipaagi sa pormal nga imbestigasyon.