Nagpagawas ang Department of Energy (DOE) og bag-ong lagda aron mapugngan ang hoarding sa mga produktong petrolyo, taliwala sa State of National Energy Emergency (SNEE) sa nasud.
Sumala sa DOE, tumong sa direktiba nga mapugngan ang artificial shortages ug masiguro nga igo ang suplay sa lana alang sa mga Pilipino.
Lakip sa mga hugot nga lakang sa ahensya ang temporaryong limitasyon sa pagpalit sa petrolyo kung gikinahanglan, ug ang mas istriktong regulasyon sa container-based transactions.
Gipalig-on usab ang pagbantay sa imbentaryo ug distribusyon sa lana pinaagi sa Emergency Petroleum Monitoring System (EPMS).
Subay niini, gipasabot usab nga gitakda ang mga proseso sa pagpatuman sa balaod, lakip ang paspas nga pag-isyu og show cause orders batok sa mga negosyanteng mosupak sa balaod.
Aron mas mapalig-on ang kampanya, gimugna pag-usab sa DOE ang ilang joint task force uban sa Department of Justice (DOJ) aron dayon nga maaksyunan ug kasuhan ang mga mapamatud-ang nag-hoard sa suplay.
Nakigtimbayayong usab ang ahensya sa Department of Trade and Industry (DTI), Philippine National Police (PNP), National Bureau of Investigation (NBI), Bureau of Fire Protection (BFP), ug mga lokal nga panggamhanan alang sa mas halapad nga monitoring.
Gipunting ni Energy Secretary Sharon Garin nga ang maong lakang gihimo aron maprotektahan ang mga konsyumer batok sa epekto sa padayon nga pag-usab-usab sa presyo sa lana sa kalibutan, tungod sa tensyon sa Middle East.