Duha ka mga gikonsiderang most wanted person sa provincial level ang nadakpan sa managlahing operasyon sa kapulisan sa Bukidnon tungod sa ilang tagsa-tagsa ka mga kaso.
Unang nadakpan ang 38 anyos nga lalaki nga giila lamang sa alyas nga “Nerald,” kinsa gituohang Top 4 Provincial-Level Most Wanted Person, sa Sitio Colon, Barangay Halapitan, San Fernando, Bukidnon, niaaadtong milabay’ng adlaw.
Gipangita kini tungod sa kasong Lascivious Conduct (2 counts) pinasikad sa warrant of arrest nga gipagawas sa Regional Trial Court Branch 8 sa Malaybalay City niadtong Enero 22, 2025, diin nagkantidad og P170,000 ang rekomendadong piyansa sa matag kaso.
Samtang, nadakpan usab ang usa ka 27 anyos nga lalaki nga gikonsiderang Top 3 Provincial-Level Most Wanted Person tungod sa kasong Carnapping, sa Zone 3, Barangay Lunocan, Manolo Fortich, Bukidnon, pasado alas-9:15 sa buntag niadtong Nobyembre 11.
Ang maong suspek, nga residente sa Barangay Damilag, Manolo Fortich, diin giatubang ang kasong paglapas sa Republic Act 10883 o New Anti-Carnapping Act of 2016. Nagkantidad og P300,000 ang rekomendadong piyansa alang sa iyang temporaryong kagawasan.
Sa pagkakaron, anaa na sa kustodiya sa San Fernando Municipal Police Station ang unang dinakpan, samtang gipailalom usab sa hustong proseso ang ikaduhang suspek.