Giawhag sa Commission on Elections (COMELEC) ang mga kwalipikadong botante sa Bukidnon nga sayo pa lamang magparehistro aron malikayan ang paghuot sa mga linya inig duol sa deadline sa voter registration alang sa 2028 National and Local Elections.
Gipadayag ni Atty. Aleli Dayo-Ramirez, Election Supervisor IV sa COMELEC-Bukidnon, nga nagsugod na niadtong Nobyembre 10, 2026 ang continuing voter registration ug magpadayon hangtod Hulyo 30, 2027.
Gilauman sa COMELEC nga mosaka og mokabat sa 100 mil ang ihap sa registered voters sa tibuok probinsya sa Bukidnon. Apil sa registration ang mga first-time voter, pagbalhin sa voting registration, pagpa-reactivate ug pagkorihir sa sayop nga personal nga impormasyon.
Gipasabot usab ni Dayo-Ramirez nga personal nga pag-adto sa COMELEC office ang gikinahanglan aron makuha ang biometrics sa mga aplikante. Mag-abli ang ilang mga opisina gikan Martes hangtod Sabado, alas-8:00 sa buntag hangtod alas-5:00 sa hapon, lakip ang satellite registration sa mga barangay ug eskwelahan.
Sa laing bahin, giawhag ang mga first-time voter nga magdala og birth certificate, samtang ang mga Indigenous Peoples mahimong mogamit sa Certificate of Confirmation gikan sa NCIP isip identification. Apil usab ang digital government-issued IDs sama sa National ID nga makita sa eGov app.