Lima ka batang babaye ang namatay human mahulog sa usa ka lawom nga sapa ang ilang gisakyang bus sa Kandal Province, Cambodia niadtong Martes.
Nahimutang ang maong lugar mga 40 kilometros sa amihanan sa kapital nga Phnom Penh.
Base sa mga saksi, kalit nga mitabok sa atubangan sa bus ang usa ka motorsiklo hinungdan nga mipreno dayon ang drayber.
Apan tungod sa kusog sa dagan, nawad-an kini og kontrol ug nidahili sa kilid sa karsada hangtod nahulog sa sapa. Naningkamot ang mga residente sa pagluwas sa mga batang sakay sa bus, apan naglisod sila tungod sa kalawom sa sapa.
Gikataho nga 26 ka mga estudyante nga nag-edad og 12 hangtod 14 anyos ang sakay sa maong bus.
Gawas sa lima nga namatay, tulo ang anaa sa kritikal nga kondisyon samtang 18 ang naangol.
Sumala sa lokal nga kapulisan, pagkalumos ang hinungdan sa pagkamatay sa lima ka bata, ug mas daghan matud pa ang namatay kon wala dayon miresponde sa pagluwas ang mga residente.
Samtang, anaa na sa kustodiya sa kapulisan ang 31 anyos nga drayber alang sa imbestigasyon.