Patay ang usa ka 24-anyos nga babaye human gipusil sa iyang 25-anyos nga live-in partner sulod sa ilang pinuy-anan sa Purok 9, Quimtras, Barangay Butong, Quezon, Bukidnon, alas 1:10 sa kaadlawon niadtong Oktubre 24, 2026.
Sumala sa imbestigasyon sa kapulisan, una nang nakadungog ang mga silingan sa panaglalis sa mag-live-in partner, nga gisundan sa hilak ug dayon sa buto sa armas.
Nakit-an ang biktima nga naghigda sa ilang kwarto nga adunay samad pinusilan sa agtang. Gidala siya sa Bukidnon Provincial Hospital sa Maramag apan gideklarang dead on arrival sa doktor.
Human sa insidente, mikalagiw ang suspek paingon sa umahan sa tubo, apan nadakpan kini sa mga barangay tanod sa Barangay Butong alas 7:30 sa buntag sa samang adlaw ug giturn-over sa Quezon Municipal Police Station.
Narekober sa crime scene ang duha ka buhing bala nga giingong kalibre .38, samtang wala naabtan og armas ang suspek atol sa pagdakop niini.
Padayon ang imbestigasyon sa kapulisan, ug ipaubos usab ang suspek sa paraffin test isip bahin sa proseso sa imbestigasyon.