Giawhag sa Philippine Red Cross-Bukidnon ang publiko nga magdonar og dugo bisan walay emerhensiya sa ilang pamilya aron masiguro ang igo ug andam nga suplay alang sa mga pasyenteng nanginahanglan niini.
Gipadayag ni Jocelyn A. Daroy, Head Officer sa Philippine Red Cross-Bukidnon, nga nagkadaghan ang nanginahanglan og dugo, ilabina ang mga pasyenteng nagpa-dialysis, adunay cancer ug leukemia, ingon man mga dengue patient nga nanginahanglan og platelet.
Matud pa ni Daroy, wala pay kapuli ang dugo sa tawo alang sa blood transfusion, busa importante ang regular nga blood donation. Gipasabot usab niya nga susihon una ang kahimsog sa donor ug ipaagi sa testing ang dugo aron masiguro nga luwas kini gamiton sa mga pasyente.
Gipasiugda usab niini ang panginahanglan sa platelet tungod kay lima lamang ka adlaw ang lifespan niini human maproseso, hinungdan nga gikinahanglan ang kanunay nga pagdonar aron mapadayon ang suplay.
Sa laing bahin, giawhag ang mga kwalipikadong donor nga motambong sa Dugong Bombo 2024 bloodletting activity sa Bukidnon State University Elementary Quadrangle, diin gikinahanglan ang donor nga adunay labing menos 50 ka kilo nga timbang ug igo nga pahulay sa dili pa magdonar.