Mitahan sa mga otoridad ang lima ka gituohang miyembro sa New People’s Army (NPA) ug giturn-over usab ang ilang lima ka armas sa Headquarters sa 1004th Maneuver Company sa Sitio Masimag, Barangay Tagbak, Talakag, Bukidnon, pasado alas 1 sa hapon niadtong Biyernes, Oktubre 23.
Giila ang mga mitahan sa alyas nga Sang, 48 anyos; Dula-dulaan, 56; Jam, 24; Merah, 20; ug Nobais, 35 anyos, nga pulos lumolupyo sa Talakag ug giingong sakop sa Sub-Regional Committee 5 sa North Central Mindanao Regional Committee.
Lakip sa ilang giturn-over ang tulo ka improvised shotgun, usa ka improvised caliber .22 rifle ug usa ka caliber .38 revolver.
Sa pagkakaron, anaa na sa kustodiya sa 1004th Maneuver Company sa Regional Mobile Force Battalion-10 ang lima ka mitahan ug ang mga armas alang sa hustong pagproseso ug dokumentasyon.