Taliwala sa mga hagit sa krisis sa lana ug ekonomiya, nagpabiling lig-on ug gani nagkadako pa ang sektor sa banking sa dakbayan sa Malaybalay ug sa tibuok probinsya sa Bukidnon. Kini ang gikumpirma ni Ronelle J. Pama, ang Presidente sa Malaybalay City Bankers Association, Inc., pinaagi sa usa ka eksklusibong pakighinabi sa Bombo Radyo Malaybalay.
Sumala ni Pama, padayon ang mga bangko sa paghatag sa mga importanteng serbisyo aron masiguro nga magpabilin nga buhi ug lig-on ang lokal nga ekonomiya sa siyudad ug probinsya.
Gipasabot ni Pama nga gikan sa 26 ka mga opisina sa bangko sa miaging mga katuigan, misaka na kini ngadto sa 27 karon. Gawas niini, duna pa’y dugang tulo (3) ka mga bag-ong bangko ang gilaumang magbukas karong tuiga o sa mosunod nga tuig.
Kini nga mga bangko kasamtangan pa nga nagproseso sa ilang aplikasyon ug permit gikan sa Bangko Sentral ng Pilipinas (BSP).Â
Usa sa dako ug maayong balita alang sa mga depositor mao ang kamatuoran nga walay bisan usa ka miyembrong bangko sa asosasyon ang nasirado sa dakbayan. Gipasigarbo sa maong pamunoan ang “resiliency” o ang katakos sa mga lokal nga bangko nga mobarog taliwala sa mga kalibutanong krisis sa ekonomiya.Â
Dugang pa ni Pama, gilaumang mas mosamot pa ka bibo ang patigayon sa Dakbayan sanglit mahatagan na sa Bangko Sentral ng Pilipinas og permit ang dugang mga bangko nga nagplano nga magbukas og bag-ong sanga sa maong dakbayan.