Subay sa pagsaulog sa National Disability Rights Week karong tuiga, gipabati sa kagamhanang lokal sa Malaybalay ang hugot ug tiunay nga pagpakaba o paghatag og bili ngadto sa sektor sa mga Persons with Disability (PWD) pinaagi sa pagpatuman sa mga programa nga direkta ug haom sa ilang mga panginahanglan.
Atol sa programang Good Morning Philippines, gipadayag ni Michelle Timones, ang head sa Persons with Disability Affairs Office (PDAO) sa Malaybalay City, nga dili muminos sa 6,000 ka mga indibidwal ang narekord nga adunay kakulian sa panglawas sa maong dakbayan, ug kini nga ihap padayon pa nga nagasaka.
Aron masiguro nga matubag ang piho nga panginahanglan sa matag PWD, nagtukod ang PDAO og nagkalain-laing “support groups” nga nakatutok sa nagkadaiyang kondisyon sama sa Autism, Down Syndrome, mga Bungol (Deaf), mga nagpa-Dialysis, ug uban pa.
Gawas sa mga support groups, gipanghambog usab sa opisyal ang mga konkretong resulta sa ilang mga programa.
Mapasigarbohon niyang gibutyag ang kolaborasyon uban sa Tebow CURE Hospital diin moabot na sa 315 ka mga bata ang natabangan ug napaubos sa libreng medikal nga operasyon alang sa mga kondisyon sama sa hernia, clubfoot (kiang), ug cleft palate (bungi).
Giklaro usab ni Timones nga ang pagbaton og kakulian sa panglawas dili babag aron mulambo ang usa ka tawo.Â
Pinaagi sa pagpaeskwela, paghatag og mga pagbansay (skills training), ug pag-atiman sa ilang mga katungod, gipaningkamutan sa Malaybalay City nga mahimong aktibong bahin sa komunidad ang matag PWD.
Sa samang higayon, nanawagan usab ang PDAO ngadto sa publiko nga magtinabangay ug magpakita og suporta aron mas mapalig-on ang maong sektor ug dili nila bation nga sila gawasnon o “labag” sa katilingban.