Gidunggab sa mag-amahan ang usa ka 38-anyos nga lalaki samtang malinawon nga nagpanihapon uban sa iyang pamilya sa gawas sa ilang panimalay sa Sitio Tagabolo, Barangay Poblacion, Impasugong, Bukidnon alas 7:40 sa gabii niadtong Abril 5, 2026.
Sa inisyal nga imbestigasyon sa kapulisan, naglingkod ang biktima ug pipila ka saksi tapad sa dalan sa dihang kalit miabot ang mag-amahang suspek ug nagpakita og samok nga pamatasan. Tungod niini, gikasab-an sila sa asawa sa biktima nga maoy misangpot sa init nga lalis.
Sa kasuko, ang 24-anyos nga anak kalit midunggab sa biktima sa tuo nga bahin sa tiyan, samtang ang iyang amahan maoy nihawid sa biktima aron masundan pa unta kini og ikaduhang dunggab. Maayo na lamang kay nakalikay ang biktima ug midagan dayon pasulod sa ilang balay aron makaluwas.
Human sa insidente, mikalagiw ang mag-amahan, apan sa tabang sa mga saksi, miadto dayon ang kapulisan sa ilang pinuy-anan diin nadakpan ang amahan, samtang ang anak nakaikyas ug padayon pang gipangita pinaagi sa hot pursuit operation.
Ang biktima gidala sa balay tambalanan, samtang ang nadakpang amahan anaa na sa kustodiya sa Impasugong Municipal Police Station ug padayon ang pagpangita sa kapulisan sa anak nga maoy nag-unang suspek sa pagpangdunggab.