Nakabsan sa kinabuhi ang usa ka 29-anyos nga lalaki human danggaba sa wala mailhing suspetsado sa Barangay Sagbayan, Dangcagan, niadtong sayong buntag sa Abril 26, 2026.
Sa report gikan sa mga otoridad, nahitabo ang krimen alas 1:50 sa kaadlawon sa Purok 4 sa maong barangay. Nasayran nga pauli na unta ang biktima gikan sa usa ka disco event isip kabahin sa selebrasyon sa “Araw ng Barangay Sagbayan” sa dihang kalit kining giatake sa ngitngit nga bahin sa dalan.
Gikaingong kalit nga mitungha ang suspetsado gikan sa luyo ug gidunggab ang biktima kaduha sa likod sa lawas. Bisan pa man sa grabeng samad nga naangkon, nakapangayo pa og tabang ang biktima sa mga residente sa dapit apan gideklarar kining dead on arrival pag-abot sa Bukidnon Provincial Hospital sa Kibawe.
Sa pagkakaron, nagpadayon pa ang gihimong lawom nga imbestigasyon sa Dangcagan Municipal Police Station aron mailhan ang mamumuno ug matino ang motibo sa maong maduguong insidente.