Kasamtangang nagpaalim sa balay tambalanan ang usa ka 58-anyos nga lalaki human dunggaba sa iyang kaugalingong kauban sa inom sa lungsod sa Kibawe niadtong miaging gabii sa Abril 25, 2026.
Matud pa sa kapulisan, nahitabo ang insidente alas 11:50 sa gabii samtang nag-inom ang biktima ug ang suspetsado. Nasayran nga tungod sa impluwensya sa ilimnong makahubog, miulbo ang usa ka mainitong lalis tali sa duha nga misangpot sa pagpangataki. Gikuha sa suspek ang usa ka kutsilyo ug gidunggab ang biktima sa wala nga bahin sa iyang kilikili.
Bisan pa man sa samad nga naangkon, nakadagan pa ang biktima paingon sa iyang panimalay aron mangayo og tabang ug daling gidala sa ospital diin kini anaa na karon sa stable nga kahimtang.
Padayon pa ang gihimong hot pursuit operation sa Kibawe Municipal Police Station aron madakpan ang suspetsado nga daling miikyas human sa maong krimen.