Labing menos 12 ka kinabuhi ang nakalas samtang dose-dosena ang naangol human sa duha ka dagkong aksidente sa panagbangga sa usa ka haywey sa sidlakang bahin sa Bulgaria kagahapong adlawa, tungod sa baga nga gabon o hamog nga nakapakunhod sa visibility sa mga motorista.
Sumala kang Health Minister Katya Ivkova, 10 ka tawo ang namatay diha mismo sa lugar sa aksidente samtang laing duha ang namatay human gidala balay tambalan.
Dugang pa niini, 46 ka tawo ang nadala sa nagkadaiyang pasilidad sa panglawas alang sa pagpanambal ug pagpa-aliml. Nahitabo ang aksidente sa duha ka magkasukwahi nga lane sa haywey nga nagdugtong sa kapital nga Sofia ug sa pantalan sa Burgas sa Black Sea, pasado alas-7 sa buntag.
Mokabat sa 86 ka sakyanan, lakip ang dagkong trak, ang nalambigit sa maong mga aksidente hinungdan sa pagsira sa haywey sa duha ka direksiyon.
Base sa inisyal nga pagsusi sa kapulisan, posibleng nakatampo sa aksidente ang kalit nga pagbaga sa gabon o fog, basa nga karsada ug pagpadagan sa mga sakyanan sa tulin nga dili angay sa kahimtang sa dalan.
Gisugdan na sa mga otoridad ang imbestigasyon sa maong insidente, samtang gipamub-an usab ni Bulgarian President Iliana Yotova ang iyang pag-apil sa Paris Peace Forum aron makabalik sa nasud.