Gikuwestiyon ni House Deputy Speaker Rep. Janette L. Garin ang kredibilidad sa testimonya ni Davao City Accountant Evangeline Bahan kalabot sa giingong ₱64,194.72 nga salary differential nga nadawat ni Vice President Sara Duterte niadtong 2023.
Matud ni Garin, ang maong kantidad giingong bayad sa salary differential ni Duterte sa panahon nga mayor pa kini sa Davao City niadtong 2020.
Apan, iyang gipunting nga wala makita sa mga dokumentong gipresentar ang klarong detalye nga magpamatuod sa katuyoan sa maong bayad.
Gipasabot sa mambabalaod nga importante ang kredibilidad sa testigo, ilabina human sa giingong adunay mga pagbag-o sa tubag ni Bahan atol sa pagpangutana bahin sa iyang kalambigitan sa accounting firm nga nagserbisyo sa mga kompanyang giugnay sa Bise Presidente.
Dugang pa niini, miangkon matud pa usab si Bahan nga usa kini sa mga founding partner sa maong accounting firm, nga nagpadagan sa dugang pang pangutana kalabot sa iyang relasyon sa mga kompanyang nalambigit sa kaso.
Sa laing bahin, gipatin-aw ni Garin nga tumong sa prosekusyon nga masuta ang pag-isyu sa tseke ngadto kang Duterte niadtong 2023, bisan pa nga ang giingong salary differential nagtumong sa iyang serbisyo sa wala pa ang tuig 2020.
Matud pa niini, ang maong isyu kabahin sa pag-ila kung adunay kalambigitan ang bayad sa mga pribadong kalihokan ug interes sa Bise Presidente.