Gipahinumdoman sa Department of Labor and Employment (DOLE) ang mga empleyado sa pribadong sektor sa ilang katungod nga makadawat og 13th month pay, lakip na ang mga nagtrabaho sulod lamang sa usa ka bulan sa kompanya.
Sumala kang Ruben T. Biado, Supervising Labor and Employment Officer sa DOLE Bukidnon Provincial Field Office, mandatory ang paghatag sa 13th month pay ug kwentahon kini base sa kinatibuk-ang basic salary nga nadawat sa empleyado sulod sa usa ka tuig, nga bahinon sa dose. Prorated usab ang kantidad alang sa mga wala nakakompleto og usa ka tuig nga serbisyo.
Dugang pa ni Biado, kwalipikado gihapon sa prorated 13th month pay ang mga ni-resign o natangtang sa trabaho, nga kinahanglan iapil sa ilang last pay sulod sa 30 ka adlaw human sa pag-undang sa trabaho.
Sa laing bahin, giawhag ang mga empleyado nga wala makadawat sa maong benepisyo nga moduol o mosulat sa DOLE, diin mahimo silang mangayo og tabang pinaagi sa mediation ug conciliation. Gipatin-aw usab ni Biado nga dili mahimong pugson sa kompanya ang mga empleyado sa pag-apil sa mga kalihokan nga dili kabahin sa ilang trabaho, sama sa pagsayaw panahon sa Christmas party.