Gikuwestiyon ni House private prosecutor Atty. Lorna Kapunan ang awtorisasyon ni Atty. Suzette Balucanag-Punay, ang ika-upat nga testigo sa depensa ni Vice President Sara Duterte sa impeachment trial.
Kini human gipaila sa depensa si Balucanag-Punay isip corporate counsel sa Gencorp Industries, Inc. ug Metro City Chow Foods Corporation, duha ka kompanyang naglambigit sa Bise Presidente.
Sa iyang manifestation, gipangutana ni Kapunan kung aduna bay board resolution gikan sa duha ka kompanya nga naghatag og awtoridad kang Balucanag-Punay sa pagtugot niini nga motestigo atol sa impeachment proceedings.
Matod ni Kapunan, kon walay maong awtorisasyon, kuwestiyonon sa prosekusyon ang kapasidad sa testigo sa pagrepresentar sa duha ka kompanya.
Mitubag usab ang defense counsel nga si Atty. Justin Nicol Gular nga mitambong ang testigo pinaagi sa virtual appearance subay sa subpoena nga gipagawas sa impeachment court.