Gikumpirma sa Bar Standards Board (BSB) sa Britain ang dinalian ug temporaryo nga pagsuspende kang Karim Khan, ang pangu nga prosecutor sa International Criminal Court (ICC), kalabot sa giatubang niini nga mga akusasyon sa sexual misconduct.
Sumala sa BSB, epektibo dayon ang maong suspensiyon ug gikatakda kining lilion o repasohon sa usa ka Interim Suspension Panel sulod sa mosunod nga upat ka semana ubos sa ilang Enforcement Regulations. Una na usab nga gisuspende sa ICC si Khan niadtong Hunyo 8 samtang gipahigayon pa ang lawom nga imbestigasyon kalabot sa maong mga alegasyon.
Sa pikas bahin, ang 56 anyos nga si Khan hugot nga nanghimakak sa tanang akusasyon sa sexual misconduct nga gipahamtang batok kaniya ug nagkanayon nga buhaton niya ang tanang legal nga pamaagi aron makuwestiyon ang maong desisyon.