Naligo sa iyang kaugalingong dugo ug nakabsan gyud sa kinabuhi ang usa ka 32-anyos nga lalaki human kini brutal nga gitigbas sa wala mailhing mga suspek didto sa Purok 5, Barangay Miarayon, Talakag, Bukidnon, pasado alas-12:30 sa kaadlawon niadtong Biyernes, Hunyo 19.
Subay sa imbestigasyon sa Talakag Municipal Police Station, usa ka motorista nga pauli gikan sa Cagayan de Oro City ang nakadiskubre sa biktima nga nagbuy-od nga nagkadugo sa daplin sa dalan, hinungdan nga dinalian kining nagpahibalo sa usa ka barangay kagawad. Pag-responde sa mga awtoridad, nasuta nga nakaangkon og mga seryosong tinigbasan sa luyo sa ulo ug wala nga kamot ang biktima, kinsa dinalian pang gidala sa Bukidnon Provincial Hospital–Talakag apan gideklara na kining Dead on Arrival (DOA) sa doktor.
Sa kasamtangan, nagpabilin pang blangko ang mga otoridad sa motibo sa maong krimen sanglit nasuta nga limpyo ug wala’y bisan unsang dautang rekord o kaaway ang biktima sa maong dapit. Padayon pa ang gihisgutan nga follow-up investigation ug intelligence operation sa kapulisan aron mailhan ug madakpan ang mga suspetsado sa maong pait nga gidangatan sa biktima.