Gikumpirma sa Swiss Foreign Ministry nga gihunong una ang giplanohang panag-istoryahanay o diyalogo tali sa Estados Unidos ug Iran nga gikatakda unta didto sa mountain resort sa Bürgenstock, Switzerland.
Pinaagi sa usa ka opisyal nga pamahayag, gipasiugda sa maong ministeryo nga nagpabilin gihapon ang kaandam sa nasod sa Switzerland nga magsilbing tigtambayayong o talamandag sa panag-istoryahanay sa duha ka nasod. Bisan pa man nga wala sila’y gihatag nga bag-ong petsa kon kanus-a kini ipadayon, padayon gihapon ang mga gihimong pagpangandam sa maong dapit.
Una niini, gipahayag na sa White House nga dili na madayon ang pagbiyahe ni US Vice President JD Vance paingon sa Switzerland tungod kay wala pa hingpit nga napinal ang mga plano ug kasunduan alang sa maong gilaumang diyalogo.