Miabot sa 46 ka tawo ang naangol human nagbangga ang duha ka pampasaherong tren duol sa main railway station sa Prague, Czech Republic. Nahitabo ang aksidente pasado alas-7:00 sa buntag, diin lakip sa grabeng angol ang duha ka drayber sa tren.
Apan, walay namatay sa maong insidente. Dali nga mitubag ang mga rescue personnel ug emergency services aron luwason ang mga pasahero ug hatagan og unang tambal ang mga angol.
Hapit duha ka oras ang gilungtad sa rescue operation sa wala pa hingpit nga maibakwit ang tanang sakay sa duha ka tren. Lakip sa mga gidala sa ospital ang 16 ka langyaw nga mga lungsoranon.
Gikumpirma sa kapulisan nga nahuman na ang rescue operation ug gisugdan na ang imbestigasyon aron matino ang hinungdan sa banggaan.
Tungod sa insidente, temporaryong naapektuhan ang biyahe sa ubang mga tren padulong ug paggawas sa kaulohan.

