Gipahibalo ni U.S. President Donald Trump niadtong Miyerkules (oras sa Amerika) nga ang mga import gikan sa mga nasud nga naghatag og military weapons sa Iran pahamtangan og 50% nga taripa, nga walay bisan unsang exemption.
Gihimo ni Trump ang maong anunsyo sa Truth Social pipila ka oras human sa kasabutan sa duha ka semana nga ceasefire sa Tehran.
Wala hisgoti ni Trump kung unsang legal nga basihan ang iyang gamiton sa pagpahigayon sa taripa, human giwagtang sa Supreme Court of the United States niadtong Pebrero ang paggamit sa International Emergency Economic Powers Act (IEEPA) aron magpataw og lapad nga global tariffs.
Tungod niini, gimando sa ubos nga korte ang pag-refund sa mga $166 bilyon nga nakolekta sa nasud sulod sa usa ka tuig.
Ang IEEPA nga balaod gigamit sukad pa 1977 aron suportahan ang financial sanctions batok sa Iran, Russia, ug North Korea, apan giingon sa korte nga milapas si Trump sa paggamit niini alang sa trade tariffs.
Wala usab giila sa Amerika kung unsang mga nasud ang posibleng maapektuhan sa taripa, apan nailhan nga nagtabang ang China ug Russia sa Iran sa pagpalig-on sa ilang military capability, lakip ang mga missile, air-defense systems, ug teknolohiya alang sa ilang depensa batok sa U.S. ug Israel.