Top 2 Most Wanted sa Bukidnon nadakpan sa kasong pagpanglugos sa menor de edad ug sexual assault

Hingpit nga natiklo sa mga otoridad ang giisip nga Top 2 Most Wanted Person sa provincial level human gikasa ang gihimong operasyon didto sa Purok Kwatro (4), Poblacion, sa lungsod sa Kadingilan, Bukidnon. Giila sa kapulisan ang nadakpan nga si Florencio Quillo Catana Senior, saysenta’y singko (65) anyos, biyudo, ug lumulupyo sa Barangay Mabuhay sa nahisgutang lungsod. Gisilbi batok sa suspek ang usa ka warrant of arrest pasado alas-syete kwarenta’y singko (7:45) sa buntag niadtong Mayo 26 tungod sa dako nga kasong pagpanglugos sa menor de edad ug sexual assault.Base sa rekord sa hukmanan, walay gitakda nga piyansa alang sa iyang kasong pagpanglugos sa menor de edad, samtang mukabat naman ngadto sa P90,000  ang girekomendang piyansa alang sa kasong sexual assault. Sa pagkakaron, nagkatingkagol na sa selda sa Kadingilan Municipal Police Station ang maong suspetsado alang sa saktong disposisyon ug legal nga dokumentasyon.