Wala nagduha-duha ang usa ka igsoong babaye nga ipapreso ang iyang kaugalingong magulang human kini dinalian nga gidakop sa kapulisan tungod sa pagpangsunog sa iyang mga kabtangan didto sa Balangay 3, Poblacion, sa lungsod sa Quezon, Bukidnon.
Giila ang suspek nga usa ka trienta’y sais (36) anyos nga lalaki, kinsa nasakpan mismo nga nagsunog sa tulo ka kabinet nga puno sa mga sinina ug personal nga gamit, lakip na ang duha ka electric stand fan nga gipanag-iya sa iyang kwarenta’y uno (41) anyos nga igsoong babaye. Tungod sa maong gihimo sa suspek, diha-diha dayong nihangyo ang biktima ngadto sa mga miresponding otoridad nga pormal kining pasakaan og kaso hinungdan nga gipahamtangan kini sa iyang mga katungod ubos sa balaod.Gibanabana sa Quezon Municipal Police Station nga mokabat ngadto sa kalim-an ka libo ka pesos (P50,000) ang kinatibuk-ang kantidad sa mga kabtangan nga naugdaw sa kalayo. Sa pagkakaron, nagtingkagol na sa selda sa kapulisan ang maong suspek samtang giandam na ang pormal nga kasong paglapas sa Presidential Decree 1613 o Simple Arson batok kaniya.