Nakatala og bag-ong Guinness World Record ang mga residente sa Mexico human nila nagama ang giisip nga labing dako ug pinakadaghang serving sa sawsawan nga gihimo gikan sa avocado o nailhan nga guacamole.
Nahitabo ang maong dako nga kalihokan atol sa ika-13 nga tinuig nga Avocado Festival didto sa Tancítaro, Mexico, diin nagtinabangay ang kapin 1,000 ka mga local growers ug mga residente sa pagsagol sa maong sawsawan sulod sa duha ka oras ug tunga. Tumong sa maong paningkamot nga mapakita sa tibuok kalibutan ang kamahanduron sa ilang abot nga avocado, ug malampuson nilang nahimo ang kinatibuk-ang 14,991 ka libras nga timbang sa maong giant bowl sa guacamole.
Tungod niini, hingpit nga nalabwan sa Tancítaro ang kanhi rekord nga natala niadtong tuig 2022 sa laing dapit gihapon sa maong nasod, hinungdan nga dako ang garbo ug selebrasyon sa mga mipartisipar nga mga mag-uuma ug lokal nga kagamhanan.