Gidunggab-patay sa silingan ang biktima nga usa ka 34-anyos nga lalaki human sa natigayong init nga panaglalis samtang nagtambong og vigil sa Purok 10, Barangay Old Damulog, Bukidnon, kagahapong adlawa, Mayo 26, 2026, mga alas 11:30 sa gabii.
Nailhan ang suspetsado nga si alyas Edgar, residente sa Sitio Purok 8 sa maong barangay, kinsa kalit lamang nibunlot og kutsilyo diin gidunggab ang biktima sa wala nga bahin sa ibabawng dughan.
Ang biktima daling gidala sa Bukidnon Provincial Hospital (BPH) sa Kibawe, Bukidnon, pinaagi sa pagresponde sa Damulog MPS, apan gideklara kining dead on arrival sa attending physician samtang nagpadayon pa ang hot pursuit operation sa kapulisan batok sa miikyas nga suspetsado.
Samtang patay usab ang usa ka wala pa mailhing lalaki human naaksidente ang gimanehoang motorsiklo o (self-accident) sa Sitio Kiuntod, Camp-1, Maramag, Bukidnon, sa susamang adlaw, takna sa alas 5:15 sa buntag.
Nasayran nga nagbiyahe ang biktima paingon sa direksyon sa Quezon, Bukidnon gamit ang itom ug pula nga Uero nga motorsiklo nga walay plaka.
Pag-abot niini sa dulhugon ug pakurbada nga bahin sa dalan, aksidente kining nibangga sa natumba nga kahoy nga nakababag sa agianan, hinungdan sa grabeng mga samad ug kadaot sa lawas ang naangkon niini.
Ang biktima daling girespondihan ug gidala sa mga personahe sa MDRRMO Maramag ngadto sa Bukidnon Provincial Hospital (BPH) sa Maramag, apan gideklara kining dead on arrival (DOA) sa attending physician.