Gikalipay sa muslim community sa dakbayan sa Malaybalay ang kahimtang sa ilang banay ug ang koneksyon o relasyon niini tali sa mga mga Kristiyano.
Matud ni Imam Abdul Malic, lider sa Muslim Community sa Malaybalay City, gihulagway niini ang maong panag-uban isip “mag-igsoon” tungod sa talagsaong kahapsay ug panaghiusa (unity) sa duha ka managlahing tinuohan.
Ang maong mensahe dungan nga gipahungaw atol sa pagsaulog sa tibuok Muslim community sa sagradong Eid’l Adha kun ang “Feast of Sacrifice”, diin nagpundok ang mga kaigsuonang Muslim sa tagsa-tagsa ka lokal nga moske alang sa hiniusang pag-ampo ug paghinatagay.
Alang kanila, ang kahulugan sa Eid’l Adha, nagpasiugda sa pagsunod, pagpaubos, ug sakripisyo ngadto kang Allah ug nagpabilin nga makahuluganon tungod sa malinawon ug dako nga suporta nga ilang madawat gikan mismo sa ilang mga silingang Kristiyano.
Sa katapusan, gipaniguro niini nga magpadayon ang ilang komunidad sa pagpatunhay sa kalinaw ug sa paglikay sa bisan unsang matang sa samok o kagubot aron mapadayon ang hapsay nga pagpuyo sa dakbayan.
Sa pikas bahin mipadayag usab Abdul Adaya Lansao sa Muslim Community og pipila ka mga kalihukan o lakang nga ginabuhat atol sa maong selebrasyon. Sumala niini, mao kini ang higayon sa panagtigom sa mga kaigsuonanag muslim aron sa pagsimba ug pakighimamat.