Gisiguro ni Presidente Ferdinand Marcos Jr. nga adunay igong suplay sa lana ang nasud sulod sa 51 ka adlaw, dungan sa padayon nga lakang sa gobyerno aron mamentinar ang igong imbentaryo sa fuel taliwala sa kagubot sa Middle East.
Gibutyag sa Presidente nga mimando na ang Philippine National Oil Company Exploration Corporation (PNOC-EC) og 1.04 ka milyon ka baril sa diesel, diin 142,000 ka baril na ang na-deliver karong semanaha ug ang nahabilin gilauman nga moabot sa bulan sa Abril.
Sa laing bahin, gisuspinde sa Energy Regulatory Commission (ERC) ang operasyon sa Wholesale Electricity Spot Market (WESM) sugod niadtong Marso 26.
Tumong niini nga makontrolar ang presyo sa kuryente ug malikayan ang kalit nga pagsaka niini samtang gi-prioritize ang mas barato nga energy sources sama sa renewable energy.
Naggahin usab dugang 1.28 bilyon pesos nga ipang-apod-apod alang sa mga trabahante sa sektor sa transportasyon sugod sa Abril 6, 2026.
Dugang pa sa Presidente, ipahigayon na usab ang nationwide distribution sa dugang pondo aron mas daghan pang benepisyaryo ang matabangan sa epekto sa nagsaka nga presyo sa lana.