Prangka nga gikuwestiyon ni Sen. Jinggoy Estrada ang tumang kapaspas nga pag-uswag sa mga kasong gisang-at batok sa pipila ka miyembro sa majority bloc sa Senado subay sa giatubang nga kasong plunder ug graft nga may kalabutan sa gikaingong flood control scandal.
Sa usa ka pamahayag, gisulti sa senador nga namatikdan niini ang mas paspas nga pagpasaka sa mga kaso sukad pag-ilis sa liderato sa Senado niadtong Mayo 11 diin gihulipan ni Sen. Alan Peter Cayetano si kanhi Senate President Vicente Tito Sotto III.
Gihisgutan usab sa senador nga giandam usab matud pa ang mga kaso batok nila Sen. Francis Escudero, Sen. Joel Villanueva ug Sen. Rodante Marcoleta.
Kahinumduman nga gisang-at sa Office of the Ombudsman ang kasong plunder batok kang Estrada sa Sandiganbayan nga walay rekomendadong piyansa may kalabutan sa alegasyong midawat kini og ₱573 milyong kickback gikan sa flood control projects.
Apan hugot gilimod sa senador ang mga alegasyon ug giingong andam kining gamiton ang tanang legal remedies aron kuwestiyonon ang kaso.