Gipahayag sa Department of Justice (DOJ) nga ipaubos sa ebalwasyon ang reklamong gisang-at sa Philippine National Police – Criminal Investigation and Detection Group (PNP-CIDG) batok kang Sen. Robin Padilla.
Sumala ni Justice Spokesperson Atty. Polo Martinez, sama sa ubang mga reklamo nga nadawat sa ilang buhatan, ipaubos usab kini sa pagsusi o ebalwasyon.
Gipatin-aw sa tigpamaba nga kini nga lakang kabahin sa gitawag nga “procedures” ug mga patakaran nga gipatuman ug kon aduna matud pa’y igong ebidensya, ang sunod nga buhaton mao ang paglusad og preliminary investigation.
Diri na dayon sutaon sa prosekusyon kung ang ebidensya maisip ba o sulod sa “standard” nga “prima facie evidence” aron pormal nga mapasakahan og kaso ang senador sa korte.
Kahinumduman nga si Sen. Robin Padilla ang gikaingong adunay kalambigitan sa paggawas o sa silbi pagpa-ikyas ni Sen. Bato Dela Rosa sa senado aron malikayan nga maserbisyohan og arrest warrant.