Andam matud pa mosakripisyo sa tanan ug bisan pa ang paghalad sa iyang kinabuhi si Senador Juan Miguel “Migz” Zubiri alang sa katawhan sa Bukidnon ug Mindanao. Kini taliwala sa grabeng pagbatikos nga iyang nadawat karon isip sakop sa Minority Block sa Senado.
Sa usa ka press conference sa Malaybalay City, emosyonal nga gipahayag ni Zubiri nga nasakitan siya sa mga pag-bash apan andam siyang panalipdan ang dungog sa iyang mga pinalanggang kabatasan batok sa bisan unsang insulto.
Gipasabot sa senador nga temporaryo lang ang politika nga mawala ra pag-abot sa tuig 2028, apan ang tiunay nga serbisyo sa iyang pamilya alang sa mga kabos, mga lumad, ug mga walay yuta ang magpabilin.
Nangayo usab og pasaylo si Zubiri sa mga taga-Bukidnon tungod sa iyang desisyon nga dili mouban sa majority bloc. Gihangyo niya ang publiko nga sabton ang iyang baruganan nga unahon ang prinsipyo kaysa sa pabor sa politika.
Giangkon sa senador nga dako ang iyang kahiubos ug kasakit sa giingong pagtraydor kaniya sa upat ka mga senador nga kaniadto niya kaalyado apan mibiya sa iyang liderato. Bisan pa man niini, gipaniguro ni Zubiri nga magpabilin ang iyang dedikasyon sa pagpanalipod sa interes sa probinsya bisan unsa pa ang dagan sa politika sa nasud.