Garbo sa Bukidnon ang gidalang dungog sa mga batan-ong atleta human nakuha ang bulawan, silver, ug bronseng mga medalya ang SDO Valencia City ug SDO Bukidnon sa ikatulong adlaw sa nagpadayong Palarong Pambansa 2026.
Laing bulawanong kadaugan ang natala sa NMRAA Northern Mindanao Stars human malampusong nasakmit sa tandem nila Mc Louren M. Castrence gikan sa SDO Bukidnon ug Mary Paul Kristia D. Bongabong gikan sa SDO Valencia City ang gold medal sa Table Tennis Elementary Girls Doubles. Samtang, mitala usab og kadaugan sila Francine Madeleine D. Wong sa SDO Valencia City alang sa Tennis Singles Elementary Girls, ug gidugangan pa kini og silver medal nila Aizelle Gene P. Libonfacil sa SDO Ozamiz City ug Kyrie Spencer E. Ugay sa SDO Valencia sa Tennis Elementary Girls Doubles.
Wala sab nagpalubad ang mga pambato sa natad sa Tennis Doubles human mingsakmit og duha ka bronze medal sila Kyle Mozart S. Ramos ug Broks Angelo I. Ente sa Secondary Boys, kauban sila Iannae Rysshia Sabit ug Xinel Ashley Paden sa Secondary Girls gikan sa SDO Bukidnon. Nadugangan pa kini og laing duha ka bronse pinaagi sa Swimming ni Alexa Breahna Tan sa SDO Bukidnon ug sa tulin nga dagan sa upat ka batan-ong runners nga sila Peter John O. Nadera, Ryhnyll P. Suico, Perkin B. Saguilongan, ug Johnry M. Lumantas sa 4x100m Relay Elementary Boys.
Tungod niini, mitala na sa kinatibuk-ang 7 ka gold, 13 ka silver, ug 12 ka bronze nga medalya ang NMRAA Northern Mindanao Stars base sa labing ulahi ug validated nga resulta subay sa alas-11:00 sa gabii kagapong adlawa, Mayo 28, 2026.