Tibuok ug solidong suporta ang gipahayag sa mga nag-unang lider sa Bukidnon alang kang Senador Juan Miguel “Migz” Zubiri, taliwala sa iyang desisyon nga mamuno sa Minority Block sa Senado.
Sa usa ka press conference sa Malaybalay City, pormal nga nidupa si Bukidnon Governor Oneil Roque ug gipaniguro nga nagpabiling lig-on ang ilang alyansa, dungan sa pag-ingon nga “bawal ang mamiya” sa ilang grupo. Gidepensahan usab ni Roque ang senador pinaagi sa pag-klaro nga ang nahitabo sa kaulohan walay kalabutan sa isyu sa mga Duterte, kondili lunsay nga mahitungod sa prinsipyo ug trabaho ni Zubiri.
Gipaluyohan usab kini ni Bukidnon Mayors League President ug Quezon Mayor Pablo “Poling” Lorenzo III, kinsa mibutyag nga nailhan sa mga taga-Bukidnon ang tiunay nga serbisyo sa senador. Matod ni Lorenzo, wala motraydor si Zubiri sa iyang mga kanhi kaalyado, kondili ang pikas kampo mismo ang makadot ug unang mitalikod kaniya sa makapila ka higayon.
Tungod sa maong unodnong suporta, dako ang pasalamat ni Zubiri sa mga lider sa probinsya ug dungan nilang gipasinggit ang panumpa sulod sa One Bukidnon nga usa ra ang lalawigan, ug walay biyaan ug traydoran.