Hugtanong gisupak sa kanhing presidente sa Integrated Bar of the Philippines kun IBP nga si Atty. Eddie Cuaresma ang planong pagtugot sa video conferencing o virtual attendance sa mga senador gawas lamang kon adunay pandemya o nasudnong krisis.
Sa eksklusibong pakighinabi sa Bombo Radyo Malaybalay, gipasabot ni Cuaresma nga mas epektibo gihapon ang personal o face-to-face nga partisipasyon sa mga mambabalaod ilabi na sa mga debate ug deliberasyon aron masuta ang kamatinud-anon sa usa ka opisyal.
Gilebelan ni Cuaresma nga delikado ug daw espesyal nga pribilehiyo kon tugotan ang virtual attendance alang sa pipila ka indibidwal—ilabi na kadtong mga adunay giatubang nga kaso—samtang ang mga ordinaryong katawhan pugsanon gyud nga pabaluron sa korte ug sa balaod.
Dugang sa abogado, gipasulabi lang kaniadto ang video conferencing tungod sa COVID-19 pandemic ug dili kini angay nga himuong regular nga pamaagi karon nga mibalik na sa normal ang nasud.
Gipasidan-an usab niini ang liderato sa Senado nga ang mga kontrobersyal nga lakang, lakip na ang giingong pagsumpo sa debate ug ebidensya, ang posibleng mopaingon sa pagkahuyang sa pagsalig sa katawhan ngadto sa maong institusyon.